പണിതീരാത്ത വീട്

ഗുരുവായൂരപ്പനൊരു വഴിപാട്

2011-01-18T10:38:00.000+03:00

വളരെയധികം ടെൻഷനോടു കൂടിയായിരുന്നു അന്ന് പരീക്ഷ ഹാളിലേക്ക് കയറിയത്.പോളി ടെക്നിക്കിലെ അവസാന വർഷത്തെ അവസാന പരീക്ഷ അന്നായിരുന്നു. വീട്ടിൽ നിന്നും നല്ല കണികണ്ടിട്ട് തന്നെയാണ് പോന്നിട്ടുള്ളത്. നല്ല കണികണ്ടിറങ്ങുക എന്നത് അമ്മയുടെ ഒരു പതിവ് രീതിയാണ്. പരീക്ഷയുള്ള ദിവസങ്ങളിൽ, ഞാൻ ഇറങ്ങുന്നതിനു മുമ്പ്,അമ്മ വീടിന് പുറത്ത് വന്ന്, വഴിയിൽ നല്ല ശകുനം വല്ലതുമുണ്ടോന്ന് ചുറ്റുപാടും നോക്കും.ഗ്രീൻ സിഗ്നൽ കിട്ടിയാലെ നമ്മുക്ക് പുറത്തേക്ക് ഇറങ്ങാൻ പറ്റു. ചുറ്റുവട്ടത്തുള്ള ശകുന-ദു:ശകുനക്കാരുടെ ലീസ്റ്റ് അമ്മയുടെ പക്കലുണ്ട്.ദുശകുനം കണ്ടിട്ടാണ് പോയതെങ്കിൽ ഞാൻ തിരിച്ചു വരുന്നതു വരെ അമ്മ ഭയങ്കര ടെൻഷനിലാവും. ചില ദിവസങ്ങളിൽ, ഇത്തരം വിശ്വാസങ്ങളിൽ പ്രതിഷേധിച്ച് ഞാൻ ഇറങ്ങി പോകാറുണ്ട്. അങ്ങനെ ഗ്രീൻ സിഗ്നൽ കിട്ടി, നല്ല കണികണ്ട്, പരീക്ഷക്ക് പോയ ഞാൻ, ഇന്റേണൽ എക്സാമിനറുടെ സീറ്റിൽ ദാസ് സാറിനെ കണ്ടതും, ഉള്ള ധൈര്യമല്ലാം ചോർന്ന് പോയി. സാറിന്റെ ബ്ല്ലാക്ക് ലിസ്റ്റിലെ ഒരു പ്രധാനിയായിരുന്നു ഞാൻ എന്നതു തന്നെ കാരണം..നറുക്കൊടുപ്പിൽ, എക്സ്പിരിമെന്റായി കിട്ടിയതോ,പ്രേക്റ്റിക്കൽ ക്ലാ‍സ്സിൽ ഒരിക്കൽ പോലും ഞാൻ ചെയ്തിട്ടില്ലാത്ത മിക്സി. വട്ടം കറങ്ങാൻ പിന്നെ ഒന്നും വേണ്ടല്ലോ. എല്ലാ ദൈവങ്ങളെയും മനസ്സിൽ ധ്യാനിച്ച് മിക്സി കൈലെടുത്ത് തിരിച്ചും മറിച്ചും നോക്കി.എവിടെന്ന് തുടങ്ങണം,എങ്ങനെ തുടങ്ങണം,ഒന്നും ഒരു പിടിയും കിട്ടുന്നില്ല. ഒരു വിധം പാർട്ട്സ് എല്ലാം പൊളിച്ചടക്കി. അതു എളുപ്പമുള്ള പണിയാണല്ലോ.പക്ഷെ തിരിച്ച് ഫിറ്റ് ചെയ്യാൻ,വിചാരിച്ച് പോലെ പറ്റുന്നില്ല.ഇനി എന്ത് ചെയ്യുമെന്നറിയതെ ചുറ്റും നോക്കിയപ്പോഴാണ്, തൊട്ടടുത്ത ടെബിളിൽ സഹപാഠി മിസ്. രേണുക (ശരിയായ പേരല്ല) സ്റ്റാർ-ഡെൽറ്റ സ്റ്റാർട്ടറിൽ (പണ്ട് നമ്മുടെ അരിപൊടിപ്പിക്കുന്ന മില്ലുകളിൽ ഉണ്ടായിരുന്ന കുന്ത്രാണ്ടം തന്നെ.) ഗുസ്തി പിടിക്കുന്നത് കണ്ടത്. എത്ര ശ്രമിച്ചിട്ടും സ്റ്റാറിൽ നിന്നും ഡൽറ്റയിലേക്ക് വീഴുന്നില്ല. ലേബിലുള്ള എക്വുബമെന്റെസ് എല്ലാം ജാബവാന്റെ കാലത്തുള്ളതണ്(ജാബുവാന്റെ കാലത്ത് സ്റ്റാർട്ടറും, മിക്സിയും ഉണ്ടായിരുന്നോന്ന് ചോദിക്കരുത്). ടെൻഷൻ കാരണമാവാം,പുള്ളികാരത്തി ആകെ വിയർത്തൊലിച്ച് ഡസ്ക്കിൽ കൈയ്യും കുത്തി കുനിഞ്ഞ് ഒരു പോസിലങ്ക്ട് നിൽ‌പ്പാണ്. വില്ലനായ കെ.പി ഉമ്മർ,നായികയായ ഷീലയെ നോക്കുന്നതുമാതിരി ഒരു നോട്ടവുമായി തൊട്ട് മുന്നിൽ അറ്റന്റ്‌ർ വർഗ്ഗിസ് സാറ് നിലപ്പുണ്ട്. “ഞാനൊന്നു നോക്കട്ടേ കുട്ടി”യെന്ന് പറഞ്ഞ് പുള്ളിക്കാരൻ സ്ക്രൂ ഡ്രൈവർ കൊണ്ടെന്തോ അഡ്ജസ്റ്റ്മെന്റ് ചെയ്ത്, പഴയ KSRTC ബസ്സിന്റെ ഗിയർ മാറ്റുന്ന മാതിരി വളരെ പണിപെട്ട് സ്റ്റാർട്ടർ ലിവർ ആദ്യം സ്റ്റാറിലേക്കും പിന്നെ ഡൽറ്റയിലേക്കും മാറ്റിയിട്ടു,തെറ്റ് ഉണ്ടായിരുന്ന കൺക്ഷ്ൻസ് മാറ്റി കൊടുത്തു. എന്നിട്ട് ദാസാറിനോട വിളിച്ചു പറഞ്ഞു”സാറെ ഈ കുട്ടിയുടെ ഓകെയാണുട്ടോ”. സംഗതി ശുഭം,എന്തോരു മഹാലുഭാവലൂ.. അതു കഴിഞ്ഞ് എന്റെടുത്തേക്ക് വന്ന സാറിനെ നോക്കി ഞാനൊന്ന് പുഞ്ചിരിച്ചു. “ഉം എന്താടോ”.’അംബിയിൽ നിന്നും അന്യനേ‘ക്കുള്ള ഭാവമാറ്റം പോലെ, പുള്ളിക്കാരന്റെ മുഖഭാവം മാറിയത് എന്നെ അത്ഭുതപ്പെടുത്തി.“അത്…സാറെ…ഈ മിക്സി അസ്സെബിൾ ചെയ്യാൻ പറ്റുന്നില്ല” ഞാൻ വിക്കി വിക്കി പറഞ്ഞു.കൂടാതെ പ്രാക്റ്റിക്കൽ ക്ലാസ്സിൽ മിക്സി റിപ്പയർ ചെയ്യാനുള്ള അവസരം കിട്ടിയില്ലാന്നുള്ള സത്യം കൂടി പറഞ്ഞു.എന്നെ ഞെട്ടിച്ചു കൊണ്ട് പുള്ളിക്കാരൻ ഉറക്കെ ദാസാറിനോട വിളിച്ചു പറഞ്ഞു,“സാറെ ഇവിടെ ഒരുത്തൻ വെള്ളം കുടിക്കുന്നുണ്ട്,അവൻ ഈ എക്സിപിരിമെന്റ് ചെയ്തിട്ടില്ലത്രെ”. ദാസ് സാർ ഇരുന്ന ഇരുപ്പിൽ മുഖമുയർത്തി നോക്കി.ആ കണ്ണുകൾ ഒന്ന് തിളങ്ങി.പ്രതീക്ഷിച്ച ഒരു ഇരയെ തന്നെ കിട്ടിയിരിക്കുന്നു.
“നീയൊക്കെ ക്ലാസ്സിൽ കയറാതെ നടക്കുമ്പോൾ ആലോച്ചിക്കണം, യൂത്ത് ഫെസ്റ്റ്‌വെൽ തൊട്ട് നിന്നെ ഞാൻ നോട്ടമിട്ടിരുന്നതാ.ഒരു അവസരം വരുമെന്ന് എനിക്കറിയാമായിരുന്നു.വർഗ്ഗീസ് സാറെ അവനെ ഹൽ‌പ്പൊന്നും ചെയ്യണ്ടാ, ഇവനൊന്നും ജയിച്ചിട്ട് വല്ല്യ പ്രയോജനമൊന്നുമില്ല”.
എന്ന ദാസാറിന്റെ പ്രഖ്യാപ്നം കേട്ടതോടെ അറ്റന്റെർ അവിടേന്ന് സ്കൂട്ടായി.

രണ്ടാം വർഷം തൊട്ടാണ് എനിക്ക് സാറിന്റെ ‘അരുമ’ ശിഷ്യനാവാൻ കഴിഞ്ഞത്. ന്യൂട്ടണും,ഫാരഡയും,ക്രിച്ചോഫ് പ്രഭുവും ഉണ്ടാക്കി വെച്ച കുറെ നിയമങ്ങളെ എങ്ങനേങ്കിലും മണ്ഡക്കുള്ളിൽ പുഷ് ചെയ്തു കേറ്റാൻ പാടുപെടുന്ന സമയം.മിക്കവാറും ദിവസങ്ങളിൽ എനിക്ക് ഉത്തരമറിയാത്ത ചോദ്യങ്ങൾ ചോദിച്ച് സാറെന്നെ ലേബിൽ നിന്നും പുറത്താക്കും. ഞാൻ പുറത്തു വരുന്നതിനു മുമ്പേ എന്റെ റഫ് റെക്കോർഡ് ബുക്ക് ലേബിന്റെ മുറ്റത്ത് ക്രേഷ് ലാന്റ്‌ ചെയ്തിരിക്കും. ഇന്റേണൽ മാർക്ക് എന്ന ‘ഡെമോക്ക്ലസിന്റെ വാൾ‘ തലക്കുമുകളിൽ തുങ്ങി കിടക്കുന്ന്തു കൊണ്ട് തിരിച്ച് ഒന്നും മിണ്ടാൻ പറ്റില്ല. പല വിദ്യാലയങ്ങളിലും അദ്യാപകർ ഇഷ്ടമില്ലാത്ത വിദ്യാർത്‌ഥികളെ കുടുക്കാൻ മനപൂർവ്വം മാർക്ക് കുറയ്ക്കുകയും, രാത്രിയുടെ മറവിൽ അദ്യാപകനെ കുനിച്ചുനിർത്തി വിദ്യാർത്ഥികൾ ഇടിച്ച സംഭവവും ഉണ്ടായിട്ടുണ്ട്. അങ്ങനെ ഇരിക്കുമ്പോഴാണ് യൂത്ത് ഫെസ്റ്റിവെൽ വരുന്നത്.പോളിക്കാർക്ക് അർമ്മാദിക്കാൻ പറ്റുന്ന രണ്ടേ രണ്ട് അവസരങ്ങളാണ് യൂത്ത് ഫസ്റ്റിവെല്ലും, കോളേജ് ഡേയും. അന്ന് ഉജ്ജാല കളറുള്ള കളസങ്ങൾ മാറ്റി എല്ലാവരും ചെത്ത് ഡ്രെസ്സിലേക്ക് മാറും,ചിലരെല്ലാം അപ്പന്റെ പഴയ വെൽബോട്ടം പേന്റും,നീളൻ കോളർ ഷർട്ടും ഇറക്കുന്ന്ത് അന്നായിരിക്കും.ഡിപ്പാർട്ടുമെന്റെ വൈസിൽ വിദ്യാർത്ഥികൾ ചേരിതിരിഞ്ഞ് തല്ലുകൂടുന്ന്തും, കൂകിവിളിക്കുന്ന്തും അന്നു തന്നെ. അവസാന വർഷ ഇലക്ട്രിക്കലിലെ പുലികുട്ടികൾ ചേർന്നുണ്ടാക്കിയ ‘ഡ്രാഗൺസ് E3’ യിൽ ഞാനും ഒരു മെംബറായിരുന്നു. തല്ലു കൊടുക്കാനും അതിലേറെ വാങ്ങിക്കാനുമുള്ള ഒരു ടീം. സ്റ്റേജിൽ ലളിതഗാനം പാടി കൊണ്ടിരിക്കുന്ന സിവിലിലെ പെൺകുട്ടിക്കെതിരെ നമ്മുടെ ടീം കൂകി വിളിതുടങ്ങി. ആ പെൺകുട്ടിയുടെ ദയനീയത കണ്ടിട്ട്, ഞാൻ എഴുനേറ്റ് നിന്ന് നമ്മുടെ ഗഡികളോട് മിണ്ടാതിരിക്കാൻ പറഞ്ഞു. അതേസമയം തന്നെ, ആ വർഷത്തെ യൂത്ത് ഫസ്റ്റ്‌വെല്ലിന്റെ ചുമതലയുണ്ടായിരുന്ന ദാസ് സാറ് ബഹളം കേട്ട് ഓഡിറ്റോറിയത്തിലേക്ക് വന്ന്തും ഒരുമിച്ചായിരുന്നു.പുള്ളി നോക്കിയപ്പോൾ, കാതിൽ കുരിശ് കമ്മലിട്ട് കൌബോയ് ഹാറ്റും വെച്ച് ഒരുത്തൻ, മൂസിക്ക് ഡയറക്ടറെ പോലെ കയ്യും വീശി ഏഴുനേറ്റ് നിൽക്കുന്നു.സത്യം പറഞ്ഞാൽ കമ്മലും ഹാറ്റും അതു വരെ തൊട്ടടുത്ത് ഇരുന്നിരുന്ന ഒരുത്തന്റെ ശരീരത്തിനെ അലങ്കരിച്ചിരുന്നതായിരുന്നു. ഏതു സമയത്താണാവേ ആ കുരിശെടുത്ത് അണിയാൻ തോന്നിയത്.വരാനുള്ളത് വഴിയിൽ തങ്ങുകയില്ലല്ലോ. ഞാൻ കുകിയിട്ടില്ലാന്ന് ആണിയിട്ട് പറഞ്ഞിട്ടും യൂത്ത് ഫസ്റ്റ്‌വെൽ കഴിയുന്നതു വരെ ഓഡിറ്റേറിയത്തിൽ കയറരുതെന്ന് എനിക്ക് ബേൻ കിട്ടി.അങ്ങനെയാണ് പുള്ളികാരന്റെ ഹിറ്റ് ലിസ്റ്റിൽ ഞാനിടം നേടിയത്.

നിശ്ചിത സമയത്തിന് 15 മിനിറ്റ് മുൻപ് ഞാനാ മിക്സി ഒരുവിധത്തിൽ അസ്സംബിൾ ചെയ്‌തെടുത്തിട്ട് സാറിന് റിപ്പോർട്ട് ചെയ്തു. പുള്ളി അടുത്തു വന്നിട്ട് “നീ ഇതിന്റെ വൈന്റിങ്, ആർമേച്ചർ തുടങ്ങിയവ ചെക്ക് ചെയ്തോന്ന് ചോദിച്ചു. സത്യത്തിൽ ടെൻഷന്റ് ഇടയിൽ ഞാനാക്കാര്യം മറന്നു പോയിരുന്നു.
“പിന്നെ എന്തൂട്ടിനാ ഇത് നീ പോളിച്ചു നോക്കിയത്, ഞാൻ ഇതിന് സപ്ലെ കൊടുക്കാൻ പോവുകയാ,മിക്സി കറങ്ങിയില്ലങ്കിൽ നീ സപ്ലിമെന്റ്‌റി പരീക്ഷക്ക് തെയ്യാറായിക്കോ”.. ദൈവമേ.. പാ‍സ്സ് മാർക്ക് വാങ്ങിയാണങ്കിലും ഇതുവരെ ഒരു പരീക്ഷയിലും തോറ്റിട്ടില്ല,ഇതിൽ തോറ്റാൽ ഒരു വർഷം പോകും, ആളുകളുടെ മുഖത്ത് എങ്ങനെ നോക്കും, മാതാപിതാക്കളുടെ പ്രതീക്ഷ… അങ്ങനെ മനസ്സിലൂടെ ഒരുപാട് കാര്യങ്ങൾ ഫാസ്റ്റ് ഫോർവേഡിൽ കടന്നു പോയി. പെട്ടെന്ന് മനസ്സിൽ’ കൃഷ്ണാ എന്നെ ഈ പരീക്ഷണത്തിൽ നിന്നും രക്ഷിക്കണേ, ഇതിൽ വിജയിച്ചാൽ ഗുരുവായൂരിൽ വന്ന് ശയനപ്രദക്ഷിണം നടത്താമേ”ന്ന് ആരോ മനസ്സിൽ പറഞ്ഞു. സാറ് സപ്ലെ കൊടുത്തതും മിക്സി വളരെ സ്മൂത്തായി കറങ്ങി.ഇതു കറങ്ങിന്ന് വിചാരിച്ചിട്ട് നീ ജയിക്കുമെന്ന് കരുതണ്ട്, എന്തായാലും നീ തോൽക്കുമെന്ന് സാറ് ഷൌട്ട് ചെയ്തു പറഞ്ഞങ്കിലും മനസ്സിൽ ജയിക്കുമെന്ന ആത്മവിശ്വാസം നിറഞ്ഞിരുന്നു. റിസൾട്ട് വന്നപ്പോൾ പാസ്സ് മാർക്ക് ഉള്ളുവെങ്കിലും ഞാൻ ജയിച്ചു. പിന്നെ ഗുരുവായൂർ പോയി ജീവിതത്തിൽ ആദ്യമായി ശയനപ്രദക്ഷിണം ചെയ്തു. കഴിഞ്ഞ തവണ ലീവിനു പോയപ്പോൾ ആദ്യ ശയനപ്രദക്ഷിണത്തിന്റെ പതിനാലാമത് വാർഷികം പ്രമാണിച്ച് ഒന്നുക്കുടെ ഉരുണ്ടു. ഒരു റൌണ്ട് ഉരുണ്ടേഴ്ന്നേറ്റപ്പോൾ “അല്ലാ വീട്ടിന്ന് പോരുമ്പോൾ പറഞ്ഞത് മൂന്ന് റൌണ്ട് ഉരുളുമെന്നാണല്ലോ, ഇത് ഒന്നേ ആയിട്ടുള്ളൂ”ന്ന് ഭാര്യയുടെ ഓർമ്മപെടുത്തൽ. സാരമില്ല അടുത്ത തവണ വരുമ്പോൾ പെന്റിങ് ഉള്ളത് ഉരുളാമെന്ന് പറഞ്ഞ് പ്രശ്നം സൊൾവാക്കി. നമ്മള് കഷ്ടപ്പെട്ട് ഉരുളുന്നതു കാണുമ്പോൾ ഭാര്യക്ക് ചിലപ്പോൾ ഭാര്യയ്ക്ക് മനസ്സിൽ സന്തോഷം തോന്നുന്നുണ്ടാവാം.

പറയാൻ വിട്ടു പോയത്
ഞാൻ ഏതേങ്കിലും ഒരു പ്രത്യേക ദൈവത്തിന്റെ ഫേനൊന്നുമല്ലായിരുന്നു. വിദ്യക്കായി സരസ്വതിയേയും, ധനത്തിനായി ലക്ഷ്മി ദേവിയേയും, വിഘ്നങ്ങളകറ്റാൻ ഗണപതിയേയും, റേഷൻ കാർഡിൽ നിന്നും പേര് വെട്ടാതിരിക്കാൻ ശിവനേയും, മുതലാളിത്ത- സാമ്രാജ്യത്വ ശക്തികളെ ഭയമുള്ളതു കൊണ്ട് മാർക്സിനേയും ഒരു പോലെ പ്രാർത്ഥിച്ചിരുന്ന ഒരു കാലമെനിക്ക് ഉണ്ടായിരുന്നു. ഇപ്പോൾ ഗുരുവായൂർ കൃഷ്ണനോട് പ്രത്യേകമായ മമത കാണിക്കുന്നുണ്ടോന്ന് ഒരു സംശയം.

ഡിസംബർ 1 ലോക എയ്ഡ്സ് ദിനം.

2010-11-30T13:01:00.000+03:00

ഇന്ന് ലോക എയ്ഡ്സ് ദിനം‍.ലോകത്ത് ഉണ്ടായതിൽ വച്ചേറ്റവും മാരകമായ രോഗത്തെ കുറിച്ച് ജനങ്ങളെ ബോധവത്കരിക്കുന്ന്തിനും, രോഗത്തിനെതിരെയുള്ള ചെറുത്ത് നിൽ‌പ്പിന് ശക്തി കൂട്ടാനുമായി ഒരു ദിനം.ദിനം പ്രതി ലോകത്ത് എയ്ഡ്സ് രോഗികളുടെ എണ്ണം കൂടിവരുകയാണ്.ഏകദേശം 25 മില്ല്യൺ ആളുകൾ ഈ മാരക രോഗം മൂലം മരണപ്പെട്ടിട്ടുണ്ടെന്നാണ് ലോകാരോഗ്യ സംഘടന പറയുന്നത്.33 മില്ല്യൺ ആളുകൾ HIV ബാധിതരായി ഈ ലോകത്ത് ജീവിക്കുന്നു..അതിൽ തന്നെ സ്ത്രീകളും കുട്ടികളും കൂടുതൽ...എയ്ഡ്സ് രോഗികളുടെ കാര്യത്തിൽ ആഫ്രിക്കൻ രാജ്യങ്ങൾ കഴിഞ്ഞാൽ രണ്ടാം സ്ഥാനത്ത് ഇന്ത്യയാണ്.

HIV ബാധിതനായ ഒരു വ്യക്തിക്ക്, രോഗത്തേക്കാൾ സമൂഹം നൽകുന്ന ഒറ്റപ്പെടുത്തൽ ആണ് അവനെ മാനസികമായി തകർക്കുന്നത്.അതിനു കാരണം ഈ രോഗത്തെ കുറിച്ച് ജനങ്ങളിൽ ഇന്നും നിലനിൽക്കുന്ന തെറ്റ് ധാരണകൾ തന്നെ. സാംസ്കാരികമായും,വിദ്യാഭാസപരമായും ഏറെ മുന്നിലെന്ന് അഹങ്കരിക്കുന്ന മലയാ‍ളികൾ ഈ കാര്യത്തിൽ ഒട്ടും പിന്നിലെല്ലാന്ന് ഏറെ വേദനാജനകമാണ്.അതിന് നമ്മുടെ കയ്യിൽ ഏറെ ഉദാഹരണങ്ങളും ഉണ്ട്. HIV ബാധിക്കുന്ന ഏറെ പേരും,പ്രതേകിച്ച് സ്ത്രീകളും, കുട്ടികളും അവരുടെ തെറ്റ് മൂലമല്ല രോഗികളായിട്ടുള്ളത്.അവർ മറ്റുള്ളവരിൽ നിന്ന് സ്നേഹവും പരിചരണവും ആഗ്രഹിക്കുന്നുണ്ട്..അവരെയും ജീവിക്കാൻ അനുവദിക്കുക..

ഒരു ‘ഹർത്താൽ കല്ല്യാണത്തിന്റെ‘ ഓർമ്മക്ക്

2010-09-07T22:47:00.000+03:00

യാത്രാസ്വാതന്ത്രം പോലും നിഷേധിച്ച ഒരു ഹർത്താൽ ദിനത്തിലായിരുന്നു, ഞങ്ങൾ ഒരുമിച്ചുള്ള ജീവിതയാത്ര തുടങ്ങിയത്. ഇണങ്ങിയും, പിണങ്ങിയും, വിരഹവും-പ്രണയവുമൊക്കയായി ഇന്ന് (sept 08) അഞ്ചു വർഷം തികയുന്നു. ഓരോ ഹർത്താൽ ദിനത്തിലും ജനങ്ങൾക്ക് അനുഭവിക്കേണ്ടി വരുന്ന ബുദ്ധിമുട്ടുകൾ കേൾക്കുമ്പോൾ, കല്ല്യാണദിവസം ഹർത്താൽ മൂലം ഞങ്ങൾ അനുഭവിച്ച ബുദ്ധിമുട്ടുകൾ ഓർക്കറുണ്ട്. കല്ല്യാണത്തിന്റെ തലേദിവസം ഉച്ചയോടു കൂടി വളരെ അപ്രതീക്ഷമായിട്ടായിരുന്നു, ഇന്ധന വില വർദ്ധവിനെതിരെയുള്ള ഇടതു പാർട്ടികളുടെ ഹർത്താൽ പ്രഖ്യാപനം. ആശുപത്രി, പാൽ വിതരണം, തീർത്‌ഥാടനം, വിവാഹം തുടങ്ങിയവക്ക് യാതൊരു തടസ്സവും ഉണ്ടാക്കില്ലന്ന് പ്രാഖാപിക്കുമെങ്കിലും, ഹർത്താൽ ദിനത്തിൽ പ്രഖ്യാപനങ്ങളെല്ലാം കാറ്റിൽ പറത്തി ഹർത്താലനുകൂലികൾ തെരുവിൽ അഴിഞ്ഞാടുകയാണ് പതിവ്.

ന്യൂസ് പരന്നതോടെ ഹർത്താലിന്റെ ആശങ്കകൾ പങ്കുവെയ്ക്കാൻ ആളുകളുടെ തുരുതുരായുള്ള ഫോൺ വിളികൾ. പല ബന്ധുക്കളും,സുഹൃത്തുക്കളും കല്ല്യാണത്തിനു വരാൻ കഴിയില്ലെന്ന് അറിയിച്ചു. കല്ല്യാണം മാറ്റിവെയ്ക്കാൻ സാധ്യതയുണ്ടോന്ന് ചേദിച്ചവരും അകൂട്ടത്തിൽ ഉണ്ടായിരുന്നു. മുൻ‌കൂട്ടി ഏൽ‌പ്പിച്ചിരുന്നതു കൊണ്ടും, പരിചയമുള്ളവരായതു കൊണ്ടും ടെമ്പോട്രാവലർ ഡ്രൈവർമാർ അവരുടെ വാഹനങ്ങൾ നിരത്തിലിറക്കാമെന്ന് സമ്മതിച്ചു. കല്ല്യാണ തലേന്ന് ഉച്ചക്ക് തുടങ്ങിയ മഴക്ക് പിറ്റേന്ന് രാവിലെ ആയപ്പോഴേക്കും ഒരു ശമനം വന്നിരുന്നു. വീട്ടിൽ നിന്നും എട്ട് – പത്ത് കിലോമീറ്റർ ദൂരം യാത്ര ചെയ്യണം കല്ല്യാണമണ്ഡപത്തിൽ എത്താൻ. വാഹനങ്ങളിലല്ലാം ‘രാജേഷ് വെഡ്സ് പ്രിയ‘ എന്നതിനേക്കാൾ വളരെ വലുപ്പത്തിൽ ‘വിവാഹം’ എന്നെഴുതി, മുൻ ഗ്ലാസ്സിൽ തന്നെ ഒട്ടിച്ചു വെച്ചു.നേരം വൈകിയതു കൊണ്ട് കൂട്ടുകാരന്റെ കാറിൽ കയറി മെയിൻ റോഡ് വിട്ട് ഷോർട്ട് കട്ട് വഴിയിലൂടെ ഞാൻ കല്ല്യാണമണ്ഡപത്തിലേക്ക് എത്തിചേർന്നു. ചെറുക്കനും കൂട്ടരും യാത്ര ചെയ്യുന്ന വാഹനവ്യൂഹത്തിന്റെയും, കല്ല്യാണചെറുക്കൻ സ്ലോമോഷനിൽ ഇറങ്ങുന്ന സീനും പകർത്താൻ കഴിയാത്തതിൽ ക്യാ‍മറമേൻ കുറച്ച് നീരസം പ്രകടപ്പിച്ചിരുന്നു. കാരണം അവർ എത്തിച്ചേരുന്നതിനു മുൻപേ ഞാൻ കാറിൽ നിന്നും ഇറങ്ങി നിന്നിരുന്നു. കല്ല്യാണത്തിന്റെ ചടങ്ങുകളെല്ലാം യഥാർത്‌ഥ്ത്തിൽ നിയന്ത്രിക്കുന്നത് അവരാണല്ലോ. ആളുകൾ കുറവായിരുന്നെങ്കിലും കല്ല്യാണം ഭംഗിയായി നടന്നു. വൈകീട്ടുള്ള റിസെപ്ഷനായിരുന്നു അടുത്ത പ്രശ്നം. പെണ്ണിന്റെ വീട്ടിൽ സദ്യക്കു വന്നിരുന്ന ആളുകളുടെ കുറവ് കണ്ടിട്ടാവാം അച്ഛൻ ഉച്ചക്ക് തന്നെ പാചകകാരൻ പയ്യനോട് “കോഴിക്കറി ചാറ് വറ്റിച്ച് ഡ്രയ് ആക്കിക്കോന്ന്” വിളിച്ചു പറഞ്ഞിരുന്നു. എന്നിട്ടും ഐറ്റംസെല്ലാം കുറച്ച്ധികം ബാക്കി വന്നു. സദ്യ കഴിഞ്ഞ് മടങ്ങുന്ന ബന്ധുക്കൾക്ക്, അച്ഛൻ ആവശ്യാനുസരണം കോഴിക്കറിയും പത്തിരിയും, ബട്ടൂരയും പോളീത്തീൻ പേക്കറ്റിൽ പൊതിഞ്ഞ് കൊടുക്കുന്നുണ്ടായിരുന്നു.വീട്ടിൽ ചെന്നിട്ട് അത്താഴത്തിന് ഒന്നും ഉണ്ടാക്കണ്ടല്ലോ, ഹർത്താലിനെ വകവെയ്ക്കാതെ കല്ല്യാണത്തിനു പങ്കെടുത്തത്തിന് അച്ഛന്റെ വക ഒരു ചെറിയ സമ്മാനം.

അഞ്ച് വർഷങ്ങൾക്ക് ശേഷം മറ്റോരു സെപ്റ്റംബർ എട്ടിന്റെ തലേന്ന് ദേശീയ പണിമുടക്കായത് തികച്ചും യാദൃശ്ചികമായി തോന്നി.

മദ്യവിൽ‌പ്നയുടെ തത്സമയ സം‌പ്രേഷണം

2010-08-27T23:27:00.000+03:00

ഇക്കഴിഞ്ഞ ഓണത്തിന് മദ്യവിൽ‌പനയുടെ റെക്കോർഡിനെ കുറിച്ച് റിപ്പോർട്ട് ചെയ്യാൻ വാർത്താചാനലുകൾ മത്സരിച്ചപ്പോൾ അങ്ങനെ ഒരു സാധ്യതയെ കുറിച്ചാണ് ആലോച്ചിച്ചത്. ഉത്രാട-തിരുവോണ ദിനങ്ങളിലെ ഇഞ്ചോടിഞ്ച് പോരാട്ടത്തിനൊടുവിൽ ചാലകുടിയെ പിന്തള്ളി കരുനാഗപ്പള്ളി ഒന്നാമെതെത്തിയ വാർത്ത കേട്ടപ്പോൾ, ഏതേങ്കിലും സ്കൂൾ യുവജനോത്സവ പോരാട്ടമോ, ഇലക്ഷനിലെ വേട്ടെണ്ണലിന്റെയോ പ്രതീതിയാണ് ഉണ്ടായത്.വരും വർഷങ്ങളിലെ ആഘോഷ ദിനങ്ങളിൽ പ്രത്യേക ന്യൂസ് റൂമിലിരുന്ന്, ബീവേറേജ് കോർപ്പറേഷന്റെ എല്ലാ ബ്രാഞ്ചിൽ നിന്നുള്ള കണക്കുകൾ ചാനലുകൾ തത്സമയം റിപ്പോർട്ട് ചെയ്യുമായിരിക്കും.അത് ഒരു പക്ഷെ ഇങ്ങനെ ആയിരിക്കും.

നികോഷ് : നമസകാരം.ഓണം പ്രമാണിച്ച് കേരളത്തിൽ മദ്യ വിൽ‌പന തകൃതിയായി നടക്കുകയാണ്. ഇതു വരെയുള്ള കണക്കുകൾ വെച്ച് നോക്കിയാൽ കഴിഞ്ഞ വർഷത്തെ റെക്കോർഡ് തകർക്കപെടാനാണ് സാധ്യത.വർഷങ്ങളായി ഏറ്റവും കൂടുതൽ മദ്യം വിറ്റ് പോകുന്ന ചാലകുടിയിൽ നിന്നും ഞങ്ങളുടെ പ്രതിനിധി കൈലേഷ് നമ്മോടപ്പം ചേരുന്നു..”കൈലേഷ് എന്താണ് ചാലകുടിയിൽ നിന്നുള്ള ഏറ്റവും പുതിയ വിവരങ്ങൾ.കഴിഞ്ഞ വർഷം അവർക്ക് നഷ്ടപ്പെട്ട ഒന്നാം സ്ഥാനം തിരിച്ചു പിടിക്കാൻ സാധ്യതയുണ്ടോ?

കൈലേഷ് : രാവിലെ ഷോപ്പ് തുറക്കുന്നതിനു മുൻപ് തന്നെ വളരെ നീണ്ട ക്യൂ ഇവിടെ രൂപപ്പെട്ടിരുന്നു.അവർ വളരെ അച്ചടക്കത്തോടും, ക്ഷമയോടും കൂടിയാണ് ക്യൂ‌വിൽ നിൽക്കുന്നതെന്ന് ഈ വീഡീയോ ദൃശ്യങ്ങൾ കണുമ്പോൾ നമ്മുക്ക് മനസ്സിലാവും.മാനുഷ്യരെല്ലാം ഒന്നു പോലെ ആമോദത്തോടെ വസിക്കുന്ന സ്ഥലമേതെന്ന് ചോദിച്ചാൽ നിസ്സംശയം പറയാം അത് ബീവേറേജിന്റെ മുന്നിലാണെന്ന്. കഴിഞ്ഞ വർഷം നഷ്ടപ്പെട്ടു പോയ ഒന്നാം സ്ഥാനം എന്തു വിലകൊടുത്തും തിരിച്ചു പിടിക്കുമെന്ന ദൃഡനിശ്ചയം ഓരോ മുഖത്തും കാണാൻ കഴിയും. അതേ പറ്റി ഇവിടുത്തെ സ്ഥിരസാന്നിദ്ധമായ അയ്യപ്പൻ ചേട്ടനോട് ചോദിക്കാം. “ചേട്ടാ എന്ത് തോന്നുന്നു, ഇപ്രാവിശ്യം നിങ്ങൾ ഒന്നാം സ്ഥാനം തിരിച്ച് പിടിക്കുമോ?

അയ്യപ്പൻ ചേട്ടൻ: അത് എന്തൂട്ട് ചോദ്യാണ്ടാ,ഇപ്രാവിശ്യം ഞങ്ങള് ഒന്നാം സ്ഥാനം അടിച്ചെടുക്കും.കഴിഞ്ഞ തവണ കരുനാഗപള്ളിയിൽ ഓണാത്തിന്റെ അവസരത്തിൽ ചില പ്രശ്നങ്ങൾ കാരണം പുറത്തു നിന്നും കുറെ ആളുകൾ വന്നിരുന്നു.അങ്ങനെ വാടകക്ക് ആളുകളെ ഇറക്കിയാണ് അവർ ഒന്നാം സ്ഥാനം നേടിയത്.ഇപ്രാവശ്യം നമ്മളും ആളെയിറക്കിട്ടുണ്ട്.

കൈലേഷ്: നികേഷ് ഇതാണ് ഇവിടുത്തെ ഏറ്റവും പുതിയ വിശേഷങ്ങൾ, ആളുകൾ ഇപ്പോഴും ബസ്സിലും ഓട്ടോയിലും കൂട്ടം കൂട്ടമായി വന്നു ചേരുന്ന കാഴ്ചയാണ് കാണുന്നത്.ചാലകുടിയിലെ ബീവറേജിന്റെ മുന്നിലുള്ള കുടിയന്മാരുടെ ഇടയിൽ നിന്നും ക്യാമറമേൻ സാബു കഞ്ഞികുഴിയോടൊപ്പം കൈലേഷ്.......

നികോഷ് :കഴിഞ്ഞ തവണ തിരുവോണത്തിന് അട്ടിമറി വിജയം നേടിയ കരുനാഗപ്പള്ളിയിൽ നിന്നുള്ള വിശേഷങ്ങളുമായി സജി നമ്മോടെപ്പം ചേരുന്നു..സജി എന്താണ് അവിടെത്തെ വിവരങ്ങൾ.ചാലകുടിയിൽ നിന്നും പിടിച്ചെടുത്ത ഒന്നാം സ്ഥാനം കരുനാഗപ്പള്ളി നിലനിർത്താൻ സാധ്യതയുണ്ടോ?

സജി:നികോഷ്...ഇവിടെത്തെ തിരക്ക് കണുമ്പോൾ അങ്ങനെ ഒരു സാധ്യത തള്ളികളയാൻ പറ്റില്ല.പിന്നെ എടുത്തു പറയേണ്ട ഒരു കാര്യം,ഇപ്രാവിശ്യം പരീക്ഷണാടിസ്ഥാനത്തിൽ തുടങ്ങിയ, സ്ത്രീകൾക്കായുള്ള പ്രത്യേക കൌണ്ടറിൽ,ഏതാനും കോളേജ് പിള്ളേർ ബീയർ വാങ്ങി കൊണ്ട് പോയതൊഴിച്ചാൽ കാര്യമായ തിരക്ക് അനുഭവപ്പെട്ടില്ലാന്നാണ്.വരും വർഷങ്ങളിൽ അതിനൊരു മാറ്റം ഉണ്ടാവുമെന്ന് നമ്മുക്ക് പ്രതീക്ഷിക്കാം.

നികോഷ് : അവിടെ ഏതേങ്കിലും തരത്തിലുള്ള പ്രശ്നങ്ങൾ റിപ്പോർട്ട് ചെയ്യപ്പെട്ടിട്ടുണ്ടോ?,മദ്യങ്ങളുടെ ഇനം തിരിച്ചുള്ള വിറ്റുവരവ് ലിസ്റ്റ് ലഭ്യമായിട്ടുണ്ടോ?

സജി: മദ്യം വാങ്ങിയവർ അവ പെട്ടിഓട്ടോയിൽ കയറ്റുന്നിടയിൽ ചില യൂണിയൻ‌കാർ ചെറുതായി പ്രശ്നങ്ങൾ ഉണ്ടാക്കിയതൊഴിച്ചാൽ പൊതുവെ സമാധാനപരമായ അവസ്ഥയാണ് ഇവിടെയുള്ളത്.ഇനം തിരിച്ചുള്ള ലിസ്റ്റ് ഇപ്പോൾ ലഭ്യമായിട്ടില്ല.എങ്കിലും ഒരു ഏകദേശ കണക്കനുസരിച്ച് പതിവു പോലെ റം തന്നെയാണ് മുന്നിട്ട് നിൽക്കുന്നെതെന്ന് പറയാം.കരുനാഗപള്ളി ബീവറേജിന്റെ മുന്നിലുള്ള ‘നാഗങ്ങൾ’ക്കിടയിൽ നിന്നും സജി....

നികോഷ് : ഓരോ ബീവേറേജ് ഔട്ട്ലെറ്റും ഇഞ്ചോടിഞ്ച് പോരാട്ടമാണ് കാഴ്ച്ച വെയ്ക്കുന്നത്.മദ്യവിൽ‌പനയിൽ ഒരു സർവ്വകാല റെക്കോർഡ് നമ്മുക്ക് പ്രതീക്ഷിക്കാം.ചാലകുടിയോ,കരുനാഗപള്ളിയോ അതോ ഇവരണ്ടുമല്ലാതെ മൂന്നാമതൊരു ജില്ല അട്ടിമറി നടത്തുമോ? കത്തിരുന്നു കാണാം.ഇടവേളയ്ക്ക് ശേഷം ഏറ്റവും പുതിയ വിശേഷങ്ങളുമായി ന്യൂസ് തുടരും

പരസ്യം

“വൈകീട്ടെന്താ പരിപാടി...?”

ഓണാശംസകളോടേ....

2010-08-19T20:37:00.000+03:00

പൊന്നോണത്തിന്റെ വരവറിയിച്ചു കൊണ്ട് മലയാളം ചാനലുകളിൽ ആഘോഷതിമർപ്പ് തുടങ്ങി.നക്ഷത്ര രാജകുമാരിമാരുടെ ലിപ്സ്റ്റിക്കിട്ട ചുണ്ടുകളിൽ നിന്നും ഓണവിശേഷങ്ങളുടെ പൊങ്ങച്ചങ്ങൾ കേൾക്കാം. നടിമാരല്ലാം ചട്ടിയും കലവുമായി ഓണപുടവയുടുത്ത് ലുടുക്ക് പാചകവിധികളുമായി നിരന്നു കഴിഞ്ഞു.പരസ്യങ്ങളിൽ ഓഫറുകളുടെ പെരുമഴക്കാലം. മൂപ്പിളമ അനുസരിച്ച് മമ്മുട്ടി മുതൽ മണികുട്ടൻ വരെയുള്ളവരുടെ സിനിമകൾ ഒന്നിനു പുറകെ ഒന്നായി കാണാം...ആന്ദലബ്ദ്ധിക്ക് ഇനിയെന്ത് വേണം.ഓണം ഏത് ചാനലിന്റെ കൂടെ ആഘോഷിക്കുമെന്ന കൺഫ്യൂഷനിൽ ഇരിക്കുമ്പോഴാണ്, വർണ്ണ കവറിൽ മാതൃഭൂമി ഓണപ്പതിപ്പ് കിട്ടിയത്.ജ്യോതിർമയിയുടെ മുഖചിത്രത്തോടു കൂടി രണ്ട് പുസ്തകം.പക്ഷെ പതിവു പോലെ ഉൾപേജുകളിൽ പകുതിയും പരസ്യം തന്നെ. കേരളത്തിലെ സകല ചാത്തൻസേവക്കരുടേയും,ജ്യോത്സന്മാരുടെയും,വൈദ്യന്മാരുടെയും വലുതും ചെറുതുമായ നിരവധി പരസ്യങ്ങൾ നിറഞ്ഞ ഓണസമ്മാനം.200രൂപ കൊടുത്ത്(നാട്ടിൽ 45രൂപയേ ഉള്ളു) ഈ പരസ്യഭാണ്ഡം വാങ്ങിക്കണമായിരുന്നോന്ന് ന്യായമായും സംശയിച്ചു. ഈ ഓണതിരക്കിനിടയിൽ ഇപ്രാവിശ്യം മാവേലി ബീവറേജിന്റെ ഏത് ബ്രാഞ്ചിലാണാവോ സന്ദർശിക്കാൻ പോകുന്നത്. .ചാല’കുടി’യിലായിരിക്കുമോ.ആവാൻ വഴിയില്ല.അവിടെ അല്ലാതെ തന്നെ നല്ല തിരക്കുണ്ട്.

ഹൃദയത്തിൽ ഒരിടം..

2010-02-16T07:49:00.000+03:00

മൊബൈയിൽ ഫോണും,ഇന്റ്‌ർനെറ്റും നഷ്ടപെടുത്തുന്ന നാട്ടുപ്രണയങ്ങളെ കുറിച്ചും, ഓരോത്തരുടെയും ജീവിതത്തിലൂടെ കടന്നു പോയ പ്രണയദിനങ്ങളെയും കുറിച്ചും കൂട്ടുകാർക്കിടയിൽ നടക്കുന്ന ഓരോ ചർച്ചയും എന്നെ എന്റെ പ്രണയ കാലത്തിലേക്ക് കൂട്ടികൊണ്ട് പോകാറുണ്ട്. ഓരോത്തരും അവരവരുടെ പ്രണയാനുഭങ്ങളെ പറ്റി അയവിറക്കുമ്പോൾ ഞാൻ ആലോചിക്കാറുണ്ട്, എന്നേങ്കിലും എവിടെങ്കിലും എന്റെ പ്രണയത്തിനെ പറ്റി എഴുതി വെയ്ക്കണമെന്ന്. ആദ്യ പ്രണയത്തിന്റെ മാധുര്യം ജീവിതത്തിലുടെ നീളം പച്ചപിടിച്ചു കിടക്കും. മഷിത്തണ്ടിലും,മയിൽപ്പീലിയിലും പ്രണയത്തിന്റെ മധുരം പകർന്ന ഇന്നലെകൾ ഇല്ലാത്തവർ ഉണ്ടാകുമോ?പാളിനോട്ടങ്ങളും പിൻനോട്ടങ്ങളും ചെറിയ പുഞ്ചിരികളും... വിറക്കുന്ന വിരലുകൾക്കിടയിലൂടെ കൈമാറ്റം ചെയ്യപ്പെട്ട ചെമ്പകപ്പൂക്കളും റോസാപ്പൂക്കളും...മനസ്സിലെ പ്രണയചെപ്പിലെ വിലമതിക്കാനാവാത്ത രത്നങ്ങളായി അവ എന്നും അവശേഷിക്കും. അങ്ങനെ ഈ പ്രണയദിനത്തിൽ ഞാൻ എന്റെ പഴയ കാലത്തിലേക്ക് ഒന്നു തിരിച്ചു പോവുകയാണ്.

**********
പതിവിനു വിപരീതമായി ഇന്ന് സ്കൂളിൽ പോകാൻ വലിയ ഉത്സാഹം തോന്നിയില്ല. ഉള്ളിൽ പറഞ്ഞറിയിക്കാനാവാത്ത ഒരു വിഷമം. ഇന്നത്തോടു കൂടി ഹൈസ്ക്കൂൾ വിദ്യാഭ്യാസം അവസാനിക്കുകയാണ്. ഈ വിദ്യാലയത്തിലെ അവസാന ദിവസം – sendoff അഥവ വിട പറയൽ ദിവസം. പരീക്ഷ എന്ന കടമ്പ കൂടി കഴിഞ്ഞാൽ ഓരോത്തർ അവരവരുടെ പുതിയ ലേകത്തിലേക്ക് യാത്ര തുടങ്ങുകയാണ്. ചടങ്ങിൽ അദ്യാപകരും വിദ്യാർത്ഥികളും പ്രസംഗിക്കുകയും, വിവിധ കലാപരിപാടികൾ അവതരിപ്പിക്കുകയും ചെയ്യുന്നുണ്ട്.പക്ഷെ അതൊന്നും ശ്രദ്ധിക്കാതെ അവൾ മാത്രം തലയും കുമ്പിട്ടിരിക്കുകയാണ്.ഇടയ്ക്കപ്പോഴോ അവൾ തലയുർത്തി എന്നെ നോക്കിയപ്പോൾ അവളുടെ കണ്ണുകൾ നിറഞ്ഞിരുന്നു.കലാപരിപാടികൾക്കു ശേഷം ചായസത്കാരം..പിന്നെ കൂട്ടുകാർ പരസ്പരം കൈകൊടുത്തും ആശ്ലേഷിച്ചുമുള്ള യാത്ര പറയൽ. നാളെ ആരെയല്ലാം വീണ്ടും കണ്ടുമുട്ടുമെന്നറിയില്ല. കൂട്ടുകാരേടല്ലാം യാത്ര പറഞ്ഞ് പുറത്തിറങ്ങിയപ്പോൾ എന്നേയും പ്രതീക്ഷിച്ച് അവൾ വരാന്തയിൽ കാത്ത് നിൽ‌പ്പുണ്ട്.ഒപ്പം കൈയ്യിൽ എന്റെ ഓട്ടോഗ്രഫും. അവൾ എഴുതിയത് ആരും വായിക്കാതിരിക്കാൻ അവസാന ദിവസമേ എന്റെ ഓട്ടോഗ്രഫിൽ എഴുതൂന്ന് അവളുടെ വാശിയായിരുന്നു. രണ്ടു പേരും കുറച്ചു നേരം മൂകമായി നിറകണ്ണുകളോടെ നോക്കി നിന്നു.”സ്വപ്നം കാണാണ്ട് നന്നായി പഠിച്ചോളോ ചെക്കാ”ന്ന് പറഞ്ഞ് അവൾ നടന്നകന്നപ്പോൾ വല്ലാത്തോരു ഏകാന്തത അനുഭവപ്പെടാൻ തുടങ്ങി. ഓട്ടോഗ്രഫിന്റെ താളിൽ അവൾ എഴുതിയിട്ട വരികൾ ഇന്നും മാഞ്ഞിട്ടില്ല. “ജീവിതത്തിൽ ഒരിക്കലും എനിക്ക് നിന്നെ മറക്കാൻ കഴിയില്ല, തിരിച്ച് നിന്നക്കും അങ്ങനെ തന്നെ എന്ന് ഞാൻ വിശ്വസിക്കുന്നു.നിന്റെ ഹൃദയത്തിൽ എനിക്കായി ഒരു ചെറിയ ഇടം എന്നുമുണ്ടാവുമെന്ന് ഞാൻ പ്രതീക്ഷിച്ചോട്ടെ”

********
എട്ടാം ക്ലാസ്സിൽ പുതിയതായി ചേർന്ന വിദ്യാർത്ഥിയായിരുന്നു ഞാൻ. ക്ലാസ്സ് തുടങ്ങിയ ദിവസം ഒരു പാട് അപരിചിതമായ മുഖങ്ങളിൽ കറുത്ത മെല്ലിച്ച -കാതിൽ കോട്ട ഞാത്തി കമ്മലിട്ട്, ഞൊറിയുള്ള മെറൂൺ ഫുൾ പാവാടയിട്ട പെൺകുട്ടിയെ ഞാൻ ശ്രദ്ധിച്ചിരുന്നോ?..മത്സരിച്ചു പഠിച്ചിരുന്ന രണ്ടുപേരും പുറമേ ശത്രുക്കാളായിരുന്നു..പക്ഷെ അകമേ പറഞ്ഞറിയിക്കാൻ കഴിയാത്ത ഒരു വികാരം അവളോട് എനിക്ക് ഉണ്ടായിരുന്നു,അതു ആരാധനയോ ഇഷ്ടമോ എന്താണന്ന് അറിയില്ല.പക്ഷെ അത് പ്രണയമാണെന്ന് കണ്ടുപിടിച്ചത് കൂട്ടുക്കാരായിരുന്നു. . എന്നുമുതലായിരിക്കും, വലതു വശത്തെ ബഞ്ചിലിരിക്കുന്ന അവളുടെ അടുത്തേക്ക് കണ്ണുകൾ അറിയതെ പോയെത്??.കണ്ണുകൾ കൂട്ടിമുട്ടിയപ്പോൾ,എന്തേന്ന് പിരികമുയർത്തി ചോദ്യഭാവവും-ഒന്നുമില്ലാന്നുള്ള തോളുകുലിക്കുള്ള് മറുപടി..എപ്പോഴായിരിക്കാം ഞാൻ എന്റെ പ്രണയം തിരിച്ചറിഞ്ഞത്? രണ്ടാഴ്ചയോളം, കണ്ണിനു സുഖമില്ലാതെ അവൾ ക്ലാസ്സിൽ വരാതരുന്നപ്പോൾ--മനസ്സിൽ ഒരു തരം വിങ്ങൽ..രാവിലെ ഒന്നാം നിലയിൽ നിന്നും റോഡിലെക്ക് നോക്കി നിൽക്കും,ചിലപ്പോൾ ആൽതറയിൽ പോയി അവളെ കാത്ത് നിൽക്കാൻ തുടങ്ങി..ഒടുവിൽ, രണ്ടാഴ്ചക്കു ശേഷം അവൾ ക്ലാസ്സിൽ വന്നു കയറിയപ്പോൾ എന്റെ ഉള്ളിൽ പറഞ്ഞറിയിക്കാൻ പറ്റാത്ത ഒരു ആനന്ദം നിറയുന്നത് ഞാനറിഞ്ഞു.,അവളുടെ കണ്ണുകൾ ആദ്യം പരതിയത് എന്നെ ആയിരുന്നു, കണ്ണുകൾ കൂട്ടിമുട്ടിയപ്പോൾ അവളുടെ ചുണ്ടിൽ വിരിഞ്ഞ പുഞ്ചിരിക്ക് ഒരു വശ്യത തോന്നി. എല്ലാ പരീക്ഷക്കും അവൾ ഒന്നാമതും ഞാൻ രണ്ടാമതും ആയിരുന്നു. ഇത്രയൊക്കെ ക്ലാസ്സുകൾ നഷ്ടപ്പെട്ടിട്ടും അടുത്തപരീക്ഷക്കും അവൾ തന്നെ ഒന്നാം റാങ്കും മെഡലും നേടിയപ്പോൾ, ടീച്ച്‌ർമാരുടെ പരിഹാസം മുഴുവനും എനിക്ക് നേരെയായിരുന്നു.അരക്കൊല്ല പരീക്ഷക്ക് അവളെ തോൽ‌പ്പിച്ച് ഞാൻ ഒന്നാം സ്ഥാനം നേടിയതിന്റെ പിറ്റേന്ന് അവൾ കൂട്ടുക്കാരി വശം കൊടുത്തു വിട്ട കുറിപ്പ് വായിച്ച് ഞാൻ വല്ലാണ്ടായി. നല്ല വടിവൊത്ത അക്ഷരത്തിൽ അതിൽ ഇങ്ങനെ എഴുതിയിരുന്നു,“ ഇപ്രവിശ്യം ഞാൻ മന:പൂർവ്വം തോറ്റുതന്നതാടാ, കാര്യം എന്താണന്നു മനസ്സിലായിക്കാണുമെന്ന് കരുതുന്നു”. അവൾ മന:പൂർവ്വം തോറ്റു തന്നതാണന്നുള്ള അറിവ് വിജയത്തിലും എനിക്ക് ഒരു പരാജിതന്റെ മുഖം തന്നു..പിന്നത്തെ 2 വർഷം കണ്ണുകൾ വാചാലവും,അധരങ്ങൾ മൌനവും പാലിച്ചുള്ള പ്രണയം.ഒടുവിൽ മൌനം ഭേദിച്ച് ഒരു സ്വതന്ത്രദിനത്തിൽ എല്ലാവരും കേൾക്കെ അവളുടെ ക്ലസ്സിൽ കയറി “.....എനിക്ക് നിന്നെ ഇഷട്ടമാണടിന്ന്’ ഉറക്കെ വിളിച്ചു കൂവിയത്...മൂത്രാപുരയുടെ ചുമരുകളും ക്ലസ്സ് മുറികളുടെ വാതിലുകളും ഞങ്ങളുടെ പേരുകൾ നെഞ്ചിലേറ്റിയത്..പരസ്പരം കൈമാറിയ പ്രണയലേഖനങ്ങളിലൂടെ ഞങ്ങളുടെ മനസ്സുകൾ തമ്മിൽ സംസാരിച്ചു.ക്ലാസ്സ് വിട്ട് വീട്ടിലേക്ക് പോകുന്ന വഴി തെങ്ങുംതോപ്പിൽ നിന്നാണ് ആദ്യ പ്രണയലേഖനം വായിച്ചത്. ചുറ്റുപാട് ആരും ഇല്ലന്ന് ഉറപ്പുവരുത്തി വിറയാർന്ന കൈകൾ കൊണ്ട് തുറന്ന കത്തിൽ “ഇഷ്ടമാണ് ഒരുപാട്” എന്ന വരിമാത്രമേ ഉണ്ടായിരുന്നുള്ളു. ആരും കാണാതെ അവൾ തന്നിരുന്ന 5സ്റ്റാർ മിഠായിക്കു പകരം കൊടുക്കാൻ കാലികീശയുമായി വരുന്ന എന്റെ കയ്യിൽ ഒന്നുമുണ്ടാവാറില്ല.വല്ലപ്പോഴും ബസ്സ് കാശ് പിശുക്കി കിട്ടുന്ന പൈസ കൊണ്ട് ഞാൻ വാങ്ങികൊടുക്കുന്ന നാരങ്ങ മിഠായി അവൾ വളരെ സന്തോഷത്തോടെയാണ് വാങ്ങിക്കറ്. .ഞങ്ങളുടെ വേഷവിധാനത്തിലുള്ള അന്തരം ഞങ്ങൾ തമ്മിലുള്ള സാമ്പത്തികാന്തരങ്ങൾ ഓർമ്മപെടുത്തികൊണ്ടിരുന്നു. പ്രതിസ്ഡികൾക്കിടയിലും പ്രണയം എനിക്ക് വിജയങ്ങൾ കൈപ്പിടിയിൽ ഒതുക്കാനുള്ള ഊർജ്ജമായിരുന്നു…

***********
തൃശൂർ വടക്കേ സ്റ്റാന്റിലെ ബസ്സ് സ്റ്റോപ്പിൽ തൂണും ചാരി നില്ക്കുമ്പോഴും, വടക്കുംനാഥന്റെ പ്രദക്ഷിണ വഴിയിലൂടെ നടക്കുമ്പോഴും, ഞങ്ങൾ സംസാരിച്ചത് ഭാവിയെ കുറിച്ചായിരുന്നു. “നീ ആദ്യം ഒരു ജോലി ശരിയാക്ക്, എന്നിട്ട് എന്റെ വീട്ടിൽ വന്ന് പെണ്ണ് ചോദിക്ക്.അവിടെ പെണ്ണുകാണൽ ബഹളം തുടങ്ങിട്ടുണ്ട്” അവൾ കൂടെ കൂടെ ഓർമ്മപെടുത്തുന്ന വാചകം.
നമ്മുക്ക് എവിടക്കേങ്കിലും ഓടിപ്പോയാലോ” ഒരു ദിവസം തമാശരൂപത്തിൽ ചേദിച്ചു.
“എങ്ങോട്ട്, നമ്മൾ എങ്ങനെ ജീവിക്കും, അതുകൊണ്ട് നമ്മുക്ക് രണ്ടാളിൽ ആർക്കേങ്കിലും ഒരാൾക്ക് ജോലികിട്ടട്ടെ.എന്നിട്ട് വീട്ടുകാർക്ക് സമ്മതമില്ലെങ്കിൽ അതെപറ്റി ചിന്തിക്കാം”.
-“ശരി, ആദ്യം ഒരു ജോലി ശരിയാവട്ടെ,നിന്നക്കറിയാമല്ലോ നമ്മൾ തമ്മിൽ നാരങ്ങമുട്ടായും,ഫൈവ്‌സ്റ്റാറു, തമ്മിലുള്ള വ്യത്യാസം ഉണ്ട്. എന്റെ വീട്ടുക്കാർ സമ്മതിച്ചാലും നിന്റെ വീട്ടുക്കാർ സമ്മതിക്കില്ല”
“നിന്റെ ഈ കോപ്ലക്സ് ഉണ്ടല്ലോ, അത് ആദ്യം തന്നെ മാറ്റ്” എന്നാവും അവളുടെ പരിഭവം കലർന്ന മറുപടി. തൊഴിൽ അനേഷിച്ചലയുന്ന വഴികൾക്ക്‌ അറ്റമില്ലെന്ന് തോന്നി നിരാശനായി ജീവിതത്തോട് തന്നെ വെറുപ്പ് തോന്നി തുടങ്ങിയ കാലമായിരുന്നു അത്. അവളെ കണ്ടുമുട്ടുമ്പോഴെല്ലാം എനിക്ക് തരാനായി അവളുടെ കൈയ്യിൽ ജോബ് വേക്കൻസിയുടെ പത്രകട്ടിങ് ഉണ്ടാവും. പിന്നെ സ്വകാര്യമായി ആ രഹസ്യം കൂടി പറഞ്ഞു…”നിന്നെ എനിക്ക് കിട്ടാനും, നിനക്ക് നല്ലതു വരാനും വേണ്ടി ഞാനിപ്പം തിങ്കളാഴ്ച്ച നോയിമ്പും നോൽക്കുന്നുണ്ട്”ജീവിതം പച്ച പിടിപ്പിക്കാനായി വടക്കേ ഇന്ത്യയിലും പിന്നെ ഭാഗ്യമനേഷിച്ചു ഗൾഫിലേക്കുമുള്ള നെട്ടോട്ടത്തിലായിരുന്നു ഞാൻ. ലക്ഷ്യത്തിലേക്കുള്ള പ്രയാണത്തിൽ പക്ഷെ തുച്ച ശബള ജോലി എന്റെ ലക്ഷ്യങ്ങളെ അകറ്റികൊണ്ടിരിന്നു. എവിടെ പോയാലും എന്റെ മേൽ‌വിലാസം തേടിപിടിച്ച് അവൾ അയച്ചിരുന്ന കത്തുകൾ എനിക്ക് അത്ഭുതവും, ഒരു സ്വാന്തനവും ആയിരുന്നു. മരുഭൂമിയിൽ പെയ്യുന്ന മഴപോലെയായിരുന്നു അവളുടെ ഒരോ കത്തും. ഡ്യൂട്ടിക്കിടയിൽ സൂപ്പർവൈസർ എഴുത്തു കൊണ്ടു വന്നു തന്നാൽ പിന്നെ അതു വായിക്കുന്നതു വരെ ആകാംഷയാണ്. ക്യാമ്പിൽ എത്തുന്നതു വരെ ക്ഷമിക്കാൻ പറ്റാത്തതു കൊണ്ട് അവൾ അയക്കുന്ന എഴുത്തുകളുടെ ആദ്യ വായന മിക്കവാറും കമ്പനി ടോയ്ലറ്റിൽ വെച്ചായിരിക്കും നടക്കുക. സെൻസർ ചെയ്യുന്നതു കൊണ്ട് അവളുടെ മേൽ‌വിലാസത്തിൽ എനിക്ക് മറുപടി അയക്കാൻ പറ്റിയിരുന്നില്ല. ഞാൻ എഴുതിയ കത്തുകൾ മിക്കവയും എന്റെ പെട്ടിയിൽ തന്നെ വീർപ്പുമുട്ടി കഴിഞ്ഞു. എങ്കിലും ചിലപ്പോഴല്ലാം ഹംസങ്ങൾ വഴി എഴുത്തുകൾ എത്തിച്ചുകൊടുക്കാറുണ്ടായിരുന്നു. ഞാൻ ഗൾഫിൽ വന്ന് ആറ് മാസം കഴിയുമ്പോഴേക്കും അവളുടെ കല്ല്യാണം വളരെ പെട്ടെന്നു തന്നെ അവളുടെ വീട്ടുക്കർ നടത്തി.ഞങ്ങളുടെ പ്രണയം അവളുടെ വീട്ടിൽ അറിഞ്ഞുവെന്നും, അതു ഒരു നിർബന്ധത കല്ല്യാണമായിരുന്നൂന്നും പിന്നിട് കൂട്ടുക്കാർ പറഞ്ഞ് ഞാനറിഞ്ഞു..കുറെ നാൾ അസ്വസ്ഥമായ മനസ്സുമായി ഞാൻ നടന്നു.പിന്നെ യാഥ്യാർത്ഥവുമായി പൊരുത്തപ്പെട്ട് തിരിച്ച് ജീവിതത്തിലേക്ക്…..വീഴ്ച്ച്കൾ എന്റെ ഭാഗത്ത് തന്നെയായിരുന്നു. ഒരു വശത്ത് തീവ്രമായ പ്രണയം, മറുവശത്ത് പൊള്ളുന്ന ജീവിത യാഥ്യാർത്ഥങ്ങൾ, ഉത്തരവാദിത്വം..കുടുംബം.. ഇതിനിടയിൽ പെട്ട്, തീരുമാനങ്ങൾ എടുക്കാൻ താമസിച്ചത്....
വടക്കുംനാഥന്റെ കല്ലുപാകിയ നടപാതയിലൂടെ ഏകനായി നടക്കുമ്പോൾ ആദ്യ പ്രണയത്തിന്റെ നനുത്ത ഓർമ്മകൾ എന്നെ ഇപ്പോഴും തേടിയെത്താറുണ്ട്. പല നാടുകൾ, ഒരു പാട് യാത്രകൾ, ഏത് ആൾക്കൂട്ടത്തിൽ ചെന്നാലും ഞാനാ മുഖം തിരയും, പക്ഷെ കഴിഞ്ഞ 11 വർഷത്തിനിടക്ക് ഒരുക്കൽ പോലും എനിക്കാ മുഖം കണ്ടെത്താൻ കഴിഞ്ഞിട്ടില്ല
“സഫലമാകാത്ത പ്രണയത്തിന്റെ നീറ്റലാണ് എന്നും എപ്പോഴും മനസ്സിൽ ആഴത്തിൽ പടർന്നിറങ്ങുന്നത്,നഷ്ടപ്രണയത്തോളം പ്രണയമായി തനിമയോടെ നിലനിൽക്കാൻ ഏത് സഫല പ്രണയത്തിനാകും?” എന്ന് എഴുത്തുക്കാരി ഖദീജ മുംതാസ് മാതൃഭൂമി ഓണപതിപ്പിൽ ‘പ്രണയത്തിന്റെ നിറഭേദങ്ങൾ’ എന്ന ലേഖനത്തിൽ ചോദിച്ചത് എത്ര ശരി

*****
നീണ്ട ഇടവേളക്ക് ശേഷം ഞാൻ പഠിച്ച വിദ്യാലയത്തിലേക്ക് ഇപ്രാവശ്യം പോയിരുന്നു. ആ‍ളൊഴിഞ്ഞ സ്കൂൾ വരന്തയിലൂടെ നടക്കുമ്പോഴും കണ്ണുകൾ ക്ലാസ്സുകളുടെ വാതിലുകളിൽ എന്തോ പരതുന്നുണ്ടായിരുന്നു,പക്ഷെ കാലം എല്ലാം മായ്ച്ചിരിക്കുന്നു.മൂത്രപുരയുടെ ചുമരിൽ പുതിയ പുതിയ പേരുകൾ.. അവയുടെ എഴുത്തിലും പുതുമയുണ്ടായിരുന്നു. കമ്മ്യൂണിസ്റ്റ് പച്ചകൊണ്ടും, ഇഷ്ടിക കഷ്ണങ്ങൾ കൊണ്ടുള്ള അക്ഷരങ്ങൾക്ക് പകരം വർണ്ണ ചോക്കും, മാർക്കർ കൊണ്ടുള്ള അക്ഷരങ്ങൾ. ഒരുപാട് കുസൃതികളും,പ്രണയങ്ങളും കണ്ട, പഴയ ആൽമരം എന്നേ കടപുഴകി വീണിരിക്കുന്നു. അതിന്റെ സ്ഥാനത്ത് പുതിയ ആൽമരം. റോഡിനോട് ചേർന്നുള്ള വൃദ്ധന്റെ പീടികയ്ക്കും കാലോചിതമായ മാറ്റങ്ങൾ കാണാം.പോയ കാലത്തിന്റെ മാധൂര്യം നുണയാനുള്ള ആർത്തിയിൽ പീടികയിൽ കയറിച്ചെന്ന് “അമ്മാവാ നാരങ്ങമുട്ടായി ഉണ്ടോ?” എന്ന് ചോദിച്ചു. കാലം തെറ്റി കയറി വന്ന അപരിചിതനെ തെല്ല് അതിശയതോടെയാണ് അയാൾ നോക്കിയത്.
“നരങ്ങമുട്ടായോ, അതിന്റെ കാലം കഴിഞ്ഞില്ലെ മോനേ, ഇപ്പോഴത്തെ കിടാങ്ങൾക്ക് മഞ്ച് മതി. അതൊരണ്ണം എടുക്കട്ടേ”. വേണ്ടന്ന് പറഞ്ഞ് നിരാശയോടെ അവിടെ നിന്നിറങ്ങി. പിന്നെ സ്കൂൾ മുറ്റത്തെ തെങ്ങും ചാരി ദൂരെയ്ക്കും കണ്ണും നട്ട് കുറച്ചു നേരം അങ്ങനെ നിന്നു
‘ഒരിക്കലും തിരിച്ചു വരാത്ത വസന്തകാലവും കാത്ത്.........

പാലഭിഷേകം

2009-10-24T12:37:00.009+03:00

ഇഷ്ട താരങ്ങൾക്ക് അമ്പലങ്ങൾ പണിയുന്ന തമിഴ്നാട്ടിൽ, ഓരോ സിനിമയുടെ റിലീസും ഉത്സവങ്ങളാണ്.റിലീസ് ദിവസം, കൊട്ടും പാട്ടും, കൂറ്റൻ കട്ടൌട്ടുകളും, കട്ടൌട്ടുകൾക്കു മുകളിലൂടെയുള്ള പാലഭിഷേകവും,ആരാധകരുടെ വാക്കുതർക്കങ്ങളും കത്തികുത്തും അവിടെ ഒരു പതിവു കാഴ്ചയാണ്. നൂറ് കണക്കിന് ലിറ്റ്‌ർ പാൽ ഇങ്ങനെ അഭിഷേകങ്ങൾക്കായി ചിലവക്കുന്നുണ്ടന്നാണ് പറയപ്പെടുന്നത് വീട്ടിലേക്ക് വാങ്ങികൊണ്ട് പോകുന്ന പാൽ പേക്കറ്റിന് തുളയിട്ട് വഴിയിൽ കണ്ട സൂപ്പർസ്റ്റാറിന്റെ പോസ്റ്റ്‌റിൽ അഭിഷേകം നടത്തുന്ന തമിഴന്റെ ഫോട്ടോ ഒരിക്കൽ പത്രത്തിൽ കണ്ടിരുന്നു.തമിഴന്റെ ഈ വക കോപ്രായങ്ങളേയും, സിനിമാഭ്രാന്തിനേയും കണക്കിന്

പരിഹസിച്ചിരുന്ന മലയാളിക്ക്, പക്ഷെ കഴിഞ്ഞ ആഴ്ച്ച പഴശ്ശിരാജയുടെ റിലീസ് കേന്ദ്രങ്ങളിലെ കോപ്രായങ്ങൾ കണ്ടപ്പോൾ, തങ്ങളും പാണ്ടിയേക്കാൾ മോശമല്ലന്ന് ബേധ്യപ്പെട്ടു. ഒരുപക്ഷെ വളരെ നാളുകൾക്ക് ശേഷം സൂപ്പർസ്റ്റാറിന്റെ ഒരു നല്ല സിനിമ വന്നതിന്റെ ആഹ്ലാദമായിരിക്കാം.ടിവിയിൽ ലൈവായി ഈ ദൃശ്യങ്ങൾ കണ്ടുകൊണ്ടിരിക്കെ സഹമുറിയൻ അണ്ണൻ ചോദിച്ചു “എന്നാ തമ്പിയിത്, നമ്മെ ഊരിലെ പൈത്യം നിങ്കെ ഊരിലും വന്താച്ചാ?. മറുപടി ഒന്നും പറയാൻ ഉണ്ടായിരുന്നില്ല.

കേരളത്തിൽ ഏതാനും വർഷങ്ങൾക്ക് മുൻപ് മാത്രം തുടങ്ങിയ ഈ ഫേൻസ് സംസ്കാരം അതിന്റെ പീക്ക് പോയന്റിൽ എത്തി നിൽക്കുകയാണ്. ചിലപ്പോൾ ഈ കോപ്രായങ്ങൾ പരിധി വിടുന്നില്ലേന്ന് ഒരു സംശയം.സൂപ്പർസ്റ്റാർ സ്ക്രീനിൽ പ്രത്യക്ഷപ്പെടുമ്പോൾ ആർത്തു വിളിക്കുക, സ്ക്രീനിലേക്ക് പഷ്പവൃഷ്ടി നടത്തുക, മറ്റു താരങ്ങളുടെ സിനിമകളെ കൂകിതോൽ‌പ്പിക്കുക, തുടങ്ങിയ ഫേൻസ് കലാപരിപാടികൾ മലയാള സിനിമക്ക് ആരോഗ്യപരമാണോന്ന് ചിന്തിക്കേണ്ടിരിക്കുന്നു. തിയ്യറ്ററുകളിൽ പോയി സിനിമ കാണുന്ന കുടുബപ്രേക്ഷകരുടെ എണ്ണം കുറഞ്ഞു വരുന്ന ഇക്കാലത്ത്, ഇത്തരം ‘കലാപരിപാടികൾ’ അവരെ കൂടുതൽ അകറ്റാനേ വഴിയുള്ളു. ഇഷ്ട് താരത്തിന്റെ പ്രതിമയിൽ സ്വന്തം വിരൽ മുറിച്ച് രക്താഭിഷേകം നടത്തുന്ന ഭ്രാന്തൻ ആരാധകരെ മലയാള മണ്ണിൽ അതിവിദൂരമല്ലാത്ത ഭാവിയിൽ കണ്ടാൽ അത്ഭുതപ്പെടാനില്ല.

വിശുദ്ധ പശുക്കളുടെ പ്രഹസനങ്ങൾ

2009-09-19T16:16:00.006+03:00

‘വിശുദ്ധ പശു’ ഈ ആഴ്ച ചാനലുകൾക്ക് ആഘോഷിക്കാൻ കിട്ടിയ പുതിയ പദപ്രയോഗം.കഴിഞ്ഞ കുറച്ചു ദിവസങ്ങളായി 'S' ആകൃതിയും,വിശുദ്ധ വെളിപ്പെടുത്തലും കൊണ്ട് ബോറടിച്ചു കൊണ്ടിരിക്കുമ്പോഴാണ് പുതിയ കക്ഷിയുടെ വരവ്. തരൂർ സാറിനു നന്ദി. പഞ്ചനക്ഷത്ര സംസ്കാരമുള്ള തരൂരിനെ പോലെയുള്ള മില്ല്യനയർ ബ്യൂറോക്രാറ്റുകളോട് കന്നുകാലി ക്ലാസ്സിൽ യാത്ര ചെയ്യാൻ പറയുന്ന ഹൈക്കമാന്റിനെല്ലേ സത്യത്തിൽ വിവരമില്ലാത്തതെന്ന് സംശയിച്ചു പോകുന്നു. ജനങ്ങളിലേക്ക് ഇറങ്ങിചെന്ന്, ജനങ്ങൾക്ക് വേണ്ടി പ്രവർത്തിക്കുന്ന ജനപ്രതിനിധികൾ അപൂർവ്വമായി വരികയാണ്. അങ്ങനെ പ്രവർത്തിച്ചിരുന്നവർ ഉണ്ടായിരുന്നു. അവരല്ലാം ഇന്ന് പാർലമെന്റിന്റെ സെൻ‌ട്രൽ ഹാളിൽ പടമായിരിക്കുന്നുണ്ട്. ഇന്നുള്ള എം.പിമാരിൽ ഭൂരിപക്ഷവും ജനങ്ങളുമായി ബന്ധമില്ലാത്ത കോടിശ്വരന്മാരാണ്. ജനങ്ങളുടെ കണ്ണിൽ പൊടിയിടാൻ യാത്രാചിലവ് ചുരുക്കിയുള്ള ഈ നാടകം കളി എത്ര നാൾ ഇവർ തുടരും. വീടു മോടി പിടിപ്പിക്കാനും, സുരക്ഷാക്രമീകരണങ്ങൾക്കും, ഓഫീസ് സ്റ്റാഫിനുമായി കോടികളാണത്രെ ഇവർ ചിലവിടുന്നത്. ഒരു മന്ത്രി തന്റെ ഓഫീസിൽ ഇറ്റാലിയൻ മാർബിൾ വിരിക്കാൻ പറഞ്ഞു പോലും.(ഇറ്റാലിയൻ ആയാൽ മേഡം സന്തോഷിക്കുമായിരിക്കും).

സാർ,

ഞങ്ങൾ കന്നുകാലികൾക്ക് ഒരു അപേക്ഷയുണ്ട്. ദയവായി താങ്കളെ പോലെയുള്ള കുബേരന്മാർ കന്നുക്കാലി ക്ലാസ്സിൽ യാത്ര ചെയ്യരുത്.ടിക്കറ്റ് ദൌർലഭ്യവും,അമിതമായ ചാർജ്ജും, തൊട്ട് തൊട്ടുരുമിയുള്ള ഇരിപ്പിടവും,ആട്ടും തുപ്പുമായി ഞങ്ങൾ ഇപ്പോഴെ ദുരിതത്തിലാണ്. തങ്കളെ പോലെയുള്ള വിശുദ്ധ പശുക്കളും,അവരുടെ പരിചാരകരും,കരിമ്പൂച്ചകളും ചേർന്ന് ഞങ്ങളുടെ കന്നുകാലി ക്ലാസ്സിലെ യാത്രാദുരിതം വർദ്ധിപ്പിക്കരുത്. താങ്കളെ പോലുള്ളവരുടെ സാന്നിധ്യം ഞങ്ങളുടെ സുരക്ഷക്കും ഭീഷിണിയാണ്. എപ്പോഴാണ് കല്ലേറ് വരുന്നതെന്ന് അറിയില്ലല്ലോ!!!

സഖാക്കൾ ഇനി ജനങ്ങളിലേക്ക് ഇറങ്ങട്ടേ..

2009-05-16T22:27:00.003+03:00

ഇതൊരു ഷോക്ക് ട്രിറ്റ്മെന്റാണ്.. ഇടതുപക്ഷത്തിനു ഒരു തിരിച്ചടി എല്ലാവരും പ്രതിക്ഷിച്ചിരുന്നെങ്കിലും, ഇത്രയും കനത്തൊരു തോൽ‌വി എതിരാളികൾ പോലും പ്രതീക്ഷിച്ചിട്ടുണ്ടാവില്ല.തങ്ങളുടെ ഉരുക്കു കോട്ടയായ ബംഗാളിൽ പോലും പാർട്ടിക്ക് തിരിച്ചടിയെറ്റു.തങ്ങളുടെ നയങ്ങളിലുണ്ടായ വ്യതിയാനവും,തമ്മിൽ തല്ലുമാണ് ഇടതുപക്ഷ പാർട്ടികൾക്ക് ഏറ്റ പരാജയത്തിനു കാരണം എന്നതിൽ യാതെരു സംശയവുമില്ല.ചരിത്രത്തിലെ ഏറ്റവും വലിയ പ്രതിസന്ധിയാണ് മാർക്സിസ്റ്റ് പാർട്ടി നേരിട്ടു കൊണ്ടിരിക്കുന്നത്.ഒരു വശത്ത് തങ്ങളുടെ പിടിവാശിയും കുതുകാൽ വെട്ടും,താൻപോരിമയും കാരണം ശിഥിലാമായ ഇടത്തു പക്ഷമുന്നണി,മറുവശത്ത് പാർട്ടി നേതാക്കളുടെ തെറ്റായ നിലപാടുകൾ മൂലം കൊഴിഞ്ഞു പോകുന്ന് അണികൾ.പാർട്ടിക്കെതിരായ നിഷേധവോട്ടുകളെ നിഷേധിച്ച് പാർട്ടി നേത്രത്തതിന് എത്രനാൾ മുന്നേട്ട് പോകാൻ കഴിയും?. നേതാക്കൾ തെറ്റ് തിരുത്തി, മത-തീവ്രവാദികളുടെ സഹവാസം നിർത്തി, ദന്തഗേപുര വാസികളാകാതെ ജനങ്ങളുടെ ഇടയിലേക്ക് ഇറങ്ങി വരുമെന്ന് പ്രതീക്ഷിക്കാം...

അക്ഷയതൃതീയ ആർക്ക് ഭാഗ്യം കൊണ്ട് വരും?

2009-04-24T22:57:00.004+03:00

അതി രാവിലെ ഫോണിന്റെ മണിയടി കേട്ടിട്ടാണ് ഉറക്കമുണർന്നത്.ഉറക്ക ഭംഗത്തിന്റെ ഒരു ചെറിയ നീരസത്തോടെ തന്നെ ഫോൺ എടുത്തു. അങ്ങേ തലക്കെൽ നാട്ടിൽ നിന്നും ഭാര്യയാണ്.

“അതെയ് ഒരു ചറിയ കാര്യം പറയാൻ ഉണ്ടായിരുന്നു, നാളെ അക്ഷയത്രിതിയാണ്.ഒരു തരി സ്വർണ്ണം മറക്കാതെ വാങ്ങിക്കോളോ, മറക്കരുത്”

“നാളെ തന്നെ വാങ്ങണോ?

“പിന്നെയല്ലാണ്ട്, അന്ന് സ്വർണ്ണം വാങ്ങിയാൽ വർഷം മുഴുവൻ ഭാഗ്യം വരുമെത്രെ,ടിവിയില്ല് പരസ്യം കണ്ടില്ലെ?”

അങ്ങനെയാണങ്കിൽ സ്വർണ്ണം വാങ്ങുന്നവരല്ലാം കുബേരന്മാരായാൽ പിന്നെ ഈ നാട്ടിൽ പാവങ്ങൾ ആരും ഉണ്ടാവില്ലല്ലോ”. ഞാൻ ഒരു സംശയം ചോദിച്ചു

“ഞാൻ പറയാനുള്ളത് പറഞ്ഞു”.കുറച്ചു പരിഭവത്തോടെ തന്നെയാണ് പുള്ളിക്കാരത്തി ഫോൺ വെച്ചിട്ടുള്ളത്. അവരെ കുറ്റം പറയാൻ പറ്റില്ല, കാരണം T.V,പത്രം തുടങ്ങി എവിടെ നോക്കിയാലും അക്ഷയതിതീയ കൊണ്ട് വരുന്ന ഭാഗ്യത്തിന്റെ പ്രലോഭനങ്ങൾ മാത്രം.കഴിഞ്ഞ ഒരാഴ്ചയായി T.V ഓൺ ചെയ്താൽ കാണുന്നത് സ്വർണ്ണ കച്ചവടക്കാരുടെ കിടമത്സരവും,വാഗ്ദാന പെരുമഴയും മാത്രം. അത്രയെന്നും പ്രചാരമില്ലാതിരുന്ന ഈ ദിനത്തിന്, ഇത്രയും പ്രചാരം നൽകിയത് ഇവിടെത്തെ ഗോൾഡ് ബിസിനസ്സ്കാർ തന്നെയാണ്..
എന്താണ് അക്ഷയതൃതീയ?
വൈശാഖമാസത്തിലെ ശുക്ലപക്ഷത്തിലെ മൂന്നാമത്തെ തിഥിയാണു അക്ഷയ തൃതീയ എന്ന് അറിയപ്പെടുന്നത്. അക്ഷയതൃതീയനാളില്‍ ചെയ്യുന്ന സദ്കര്‍മ്മങ്ങളുടെ ഫലം ക്ഷയിക്കില്ല എന്ന് പുരാതനകാലം മുതല്‍ക്കേ വിശ്വസിക്കുന്നു.മത്സ്യപുരാണത്തിലും,നാരദീയപുരാണത്തിലും അക്ഷയതൃതീയയെപ്പറ്റി പ്രസ്താവിച്ചിട്ടുണ്ട്. ഒരു പാട് ഐതീഹ്യങ്ങളും ഇതിനു പിന്നിലുണ്ട്.അന്നേ ദിവസം വാങ്ങിക്കുന്ന വസ്തുക്കൾക്ക് പിന്നിടൊരിക്കലും ക്ഷാമം വരില്ലെത്ര!! അതു കൊണ്ട് തന്നെ വിലപിടിപ്പുള്ള വസ്തുക്കൾ വാങ്ങാനായി ആളുകൾ ഇന്നെ ദിവസം തിരഞ്ഞടുക്കുന്നു.
പക്ഷെ പുരാണങ്ങളിൽ ഇതോടനുബന്ധിച്ച് പറയുന്ന ചില കാര്യങ്ങൾ നമ്മൾ മന:പൂർവ്വം മറന്ന് പോകുന്നുണ്ട്.. അക്ഷയതൃതീയ ദിനത്തിൽ ദാനധർമ്മാദികൾ - വിശേഷ്യാൽ ദാനങ്ങളിൽ ഏറ്റവും പുണ്യമായി കരുതുന്ന അന്നദാനം തുടങ്ങിയ സത്കർമ്മങ്ങൾ നടത്തിയതിനു ശേഷമാണ് നിങ്ങൾ വിലപിടിപ്പുള്ള വസ്തുക്കൾ വാങ്ങി വീട്ടിൽ കൊണ്ട് വരേണ്ടത്.അങ്ങനെ ചെയ്യുന്ന എത്ര പേർ നമ്മുക്കിടയിൽ ഉണ്ട്. ആഭരണക്കടയിലെ ‘സെയിൽ‌സ് മേൻ‌മ്മാരോ’, വിശ്വസ്ത സ്ഥാപനങ്ങളുടെ മുതലാളിമാരോ മേൽ‌പ്പറഞ്ഞ കാര്യം നമ്മളോട് പറയുകയോ അവരുടെ പരസ്യങ്ങളിൽ ഉൾപ്പെടുത്തുകയോ ചെയ്യാറില്ലല്ലോ.
**********

സഖാക്കളെ മുന്നോട്ട് (എങ്ങോട്ട്)

2009-03-27T12:16:00.009+03:00

പി ക്യഷ്ണപിള്ളയുടെ, സഖാക്കൾക്ക് എന്നും ആവേശകരമായ മുദ്രാവാക്യം . ഒളിവിൽ കഴിഞ്ഞും, മർദ്ദക ഭരണകൂടങ്ങളുടെ കൊടിയ പീഢനമേറ്റും,പട്ടിണികിടന്ന്,‘പരിപ്പുവടയും കട്ടൻ ചായയും’ ഭക്ഷണമാക്കി സഖാക്കൾ വളർത്തിയ പാർട്ടി,സാമ്രജ്യത്വ - വർഗ്ഗീയ-മത ശക്തികൾക്കെതിരെ മുദ്രാവാക്യം ഉയർത്തിയ പാർട്ടി,എന്തിന്, മതം മനുഷ്യനെ മയക്കുന്ന കറുപ്പാണന്ന് പറഞ്ഞ മാക്സിന്റെ പാർട്ടി-വർത്തമാന കാലത്തിൽ അവയല്ലോം വാരിപുണരുമ്പോൾ,സഖാക്കളെ നിങ്ങൾ എങ്ങോട്ടാണന്ന ചോദ്യം ഉയരുന്നു. ഒരു വശത്ത് വിശാല ഇടതുപക്ഷ ഐക്യം എന്ന് വാചകമടിക്കുകയും മറുവശത്ത് അവരെയെല്ലാം മുന്നണിയിൽ നിന്ന് ചവിട്ടിപുറത്താക്കി pdp,പഴയ bjp കാരൻ രാമൻപിള്ളയുടെ ജനപക്ഷം തുടങ്ങിയ വർഗ്ഗിയകക്ഷികളുമായി കൂട്ടുകൂടുന്ന പുതിയ സമീപനമാണ് cpm കൈകൊണ്ടിട്ടുള്ളത്.ഒറിസ്സയിലെ ന്യുനപക്ഷങ്ങളെ സംഘപരിവാറുകാർ ചുട്ടുകൊന്നപ്പോൾ ഒരു ചെറുവിരൽ പോലും ഇനക്കാതിരുന്ന നവീൻ പട്നായിക്കുമായി കൂട്ടുചേരുകയും അതേ സമയം ന്യൂനപക്ഷങ്ങൾക്കു വേണ്ടി കണ്ണിർ ഒഴുക്കുകയും ചെയ്യുന്ന സഖാക്കൾ.പത്ത് വോട്ടിന് വേണ്ടി ഏത് ചെകുത്താന്മാരുമായി കൂട്ട് കൂടാം എന്ന് പോളസി. വി.പി.സിംഗ് അധികാരത്തൽ എത്തിയ 89-ലെ ഇലക്ഷനിൽ ബി.ജെ.പിയുമായി കൂട്ട് കൂടിയ ഇടതുപക്ഷം,അതിന് വലിയ വില കൊടുക്കേണ്ടി വന്നു.വെറും 2 സീറ്റിൽ നിന്നും 84 സീറ്റിലേക്കുള്ള BJPയുടെ വളർച്ചയും,പിന്നീട് അവരുടെ തീവ്രഹിന്ദുത്വ നിലപാടുകളും ഇന്ത്യാ രാജ്യം കണ്ടതാണ്. ഭരണപരാജയവും,അഴിമതി ആരോപണങ്ങളും,തമ്മിൽ തല്ലും കൊണ്ട് പൊറുതിമുട്ടിയ പാർട്ടിക്ക്,ജനശ്രദ്ധ തിരിച്ച് വിടാൻ ഒരു പുതിയ വിഷയം കൂടിയായി pdpയുമായുള്ള ബന്ധം.pdp വർഗ്ഗീയ കക്ഷിയാണോ അല്ലയോ എന്നുള്ള വിഷയത്തിലേക്ക് ശ്രദ്ധ/ചർച്ച കൊണ്ട് വരാൻ cpmന് കഴിഞ്ഞു.cpmഉം pdpയും ഇന്നും ഇന്നലെയുമായി തുടങ്ങിയ ബന്ധമല്ല, മറിച്ച് പണ്ടുണ്ടായിരുന്ന ഒളിസേവ മതിയാക്കി ഇപ്പോൾ പരസ്യമാഇ സേവ ചെയ്യുന്നു എന്നു മാത്രം.93ലെ ഒറ്റപ്പാലം ഉപതിരഞ്ഞടുപ്പിൽ എസ്.ശിവരാമൻ എന്ന SFI നേതാവ് ഒരു ലക്ഷ്ത്തിലധികം വോട്ടിന് ജയിച്ചത്,ബാബറി മസ്‌ജ്ജിദ് പ്രശ്നം മാത്രമായിരുന്നില്ല കാരണം PDP യുടെ പരസ്യമായ പിന്തുണ കൂടിയുണ്ടായിരുന്നു.മദനിയുടെ തീപൊരി പ്രസംഗങ്ങളുടെ കാസറ്റ് സഖാക്കൾ മണ്ഡലത്തിൽ വ്യാപകമായി പ്രചരിപ്പിച്ചിരുന്നു.അന്ന് മദനിക്ക് പ്രസംഗിക്കാൻ സ്റ്റേജ് കെട്ടികൊടുത്ത ഇവർ തന്നെയാണ് പിന്നീട് അദ്ദേഹത്തെ കോയമ്പത്തൂർ സ്ഫോടനങ്ങളുടെ പേരിൽ തീവ്രവാദിയെന്ന് മുദ്രകുത്തി തമിഴ്നാട് സർക്കാറിന് പിടിച്ചു കൊടുത്തത്.അന്ന് സ: നായനാർക്കും പാർട്ടിക്കും വർഗ്ഗിയവാദിയായ മദനി ഇന്ന് ഇങ്ങനെ പിണറായിക്ക് നല്ലവനായി.കഴിഞ്ഞ ഇലക്ഷനിൽ പിഡിപി ക്ക് പൊന്നാനിയിൽ കിട്ടിയ വോട്ടിലാണ് സിപീഎം ന്റെ കണ്ണ്. ഒരു പക്ഷെ അന്ന് വിചാരണ കൂടാതെ ജയിലിൽ കിടന്നിരുന്ന മദനിക്ക് കിട്ടിയ സഹതാപ വോട്ടായിരുന്നു അതെന്ന് ആരു കണ്ടു.പിഡിപി വർഗ്ഗിയപാർട്ടിയാണോ അല്ലെയോ എന്നുള്ളത് ജനങ്ങൾ തീരുമാനിക്കട്ടെ,പിണറായി വിജയനും സഖാക്കളും നൂറ് തവണ ആവർത്തിച്ചാലും സത്യം സത്യമല്ലാതെ വരില്ലല്ലോ.പിഡിപി യുടെ ആദ്യ രൂപമായ ISS ന്റെ പ്രവർത്തനങ്ങളും, പിന്നിട് പിഡിപി യായി രൂപം മാറിയപ്പോഴും അവരുടെ നേതാക്കൾ സ്വീകരിച്ച് നിലപാടുകൾ കേരള സമൂഹം മറക്കാറായിട്ടില്ല.

വി.എസിനെ പോലെയുള്ളവർ ഒരു പരിധി വരെ പാർട്ടിക്കുള്ളിൽ ഇത്തരം പ്രവണതകൾക്കെതരെ പ്രതിഷേധ ശബ്ദം ഉയർത്തുന്നുണ്ടങ്കിലും,ഒടുവിൽ അവരും നിലവിലെ വ്യവസ്ഥിതിയുമായി ഒത്തു പോകുന്ന് കാഴ്ചയാണ് നമ്മുക്ക് കാണാൻ കഴിയുന്നത്.വി.എസ് പാർട്ടി വിട്ട് പോരാത്തിന് കാരണം ഒരു പക്ഷെ പാർട്ടിക്കുള്ളിൽ നിന്ന് കൊണ്ട് പാർട്ടിയെ ശുദ്ധികരിക്കാമെന്ന മൂഢവിശ്വാസം കൊണ്ടാവാം;അല്ലെങ്കിൽ അധികാരത്തിന്റെ മത്ത് അദ്ദേഹത്തേയും ബാധിച്ചിട്ടുണ്ടാവാം.ADB തുടങ്ങിയ കാര്യത്തിൽ അദ്ദേഹത്തിന്റെ മലക്കം മറച്ചിൽ കേരളം കണ്ടതാണല്ലോ.ബക്കറ്റിലെ വെള്ളമാകാതെ സമുദ്രത്തിന്റെ മാർതട്ടിൽ അലിഞ്ഞ ചേരാനാണാണ് പാർട്ടി സെക്രട്ടറിയുടെ ആഹ്വാനം.സമുദ്രത്തെ പല തരത്തിൽ വ്യഖ്യാനിക്കാം,അഴിമതിയുടെ സമുദ്രമെന്നോ,വർഗ്ഗിയതയുടെ സമുദ്രമെന്നോ.അത്തരം സമുദ്രത്തിൽ അലിഞ്ഞ് ചേർന്ന് വൻ തിരമാലയായി കേരളത്തിൽ ആഞ്ഞടിക്കണം.അപ്പോഴേ ‘സുരക്ഷിത ഇന്ത്യ-ഐശ്വര്യ കേരളം’ എന്ന ജാഥയുടെ വിജയം പൂർണ്ണമാവുകയുള്ളു.ഈ വിവാ‍ദങ്ങൾക്കിടയിൽ നേട്ടമുണ്ടാക്കിയ വ്യക്തി ഹുസൈൻ രണ്ടത്താണിയാണ്,അദേഹത്തെ ഒറ്റദിവസം കൊണ്ട് കേരളം മുഴുവൻ അറിയപ്പെടുന്ന വ്യക്തിയക്കി മാറ്റിയില്ലേ നമ്മുടെ മാധ്യമങ്ങൾ എന്തായാലും പുതിയ സഖ്യത്തിന്റെ നേട്ടങ്ങളും കോട്ടങ്ങളും അറിയാൻ ഇലക്ഷൻ കഴിയുന്നതു വരെ കാത്തിരിക്കാം.